Bul kúnderi egis alqaptarynda sandyq tehnologııaǵa negizdelgen dán sebýdiń zamanaýı keshenderi qoldanylýda. Sebiletin tuqymnyń naqty kólemi, janar-jaǵarmaıdyń jumsaý mólsherin avtomattandyrylǵan tehnıka basqarýda.
Kóktemgi dala, egis jumystaryna 1397 tehnıka jumyldyrylǵan, 44 zamanaýı sebý kesheni bar. Traktorlardyń 54 paıyzy, kombaındardyń 60 paıyzy jańartylǵan. Bıyl taǵy jańa aýylsharýashylyq tehnıkalary satyp alynypty. Tehnıkalar qunynyń 20-25 paıyzy ınvestısııalyq sýbsıdııa retinde qaıtarylyp berilmek. Kóktemgi egis jumystaryna úshin aýdanǵa 3555 tonna janarmaı bólingen. Mıneraldy tyńaıtqyshtar men gerbısıdterge sýbsıdııa beriledi. 236 903 gektar jerdi elektrondy kartaǵa engizý josparlanýda.
Aýdandyq aýyl sharýashylyq bóliminiń málimetinshe, byltyr aýdan dıqandary gektarynan ortasha eseppen 12 sentnerden astyq jınady. Kóktemgi egis naýqany aldaǵy aıdyń basynda aıaqtalady. Bıyl aýdany boıynsha jalpy egistik alqaby 263 133 gektar bolsa, 210 myń gektar dándi daqyldar, 26 myń gektarǵa jýyq alqapqa maıly daqyldar egilse, 450 gektarǵa kartop otyrǵyzyldy. Aýdanda kóktemgi egiske 33 608 tonna tuqym ázirlenip, arnaıy zerthanalyq tekserýden ótkizilgen.
Farıda Byqaı,
«Egemen Qazaqstan»
Pavlodar